SA TRAWLER HERITAGE

'n GEBED VIR PELAGIESE VIS

Heer, hierby vra ons dat u die trotste pelagiese vloot ter wêreld sal seën met 'n oorvloed pelagiese vis gedurende die 2023 seisoen. Hou asseblief u veilige hand oor die vloot, vissermanne, fabriekspersoneel en die wat die kosmandjies voorberei ten einde arbeid te kan verrig. Amen.

         DIE SKUITE HOU VERJAARSDAG!

Hieronder volg 'n groot verjaarsdaglys vir November-maand waartydens ons 41 skuitverjaarsdae vier, wat ook te verstane is namate die skeepswerwe gedurende November maande alles insit om skuite klaar te bou voordat die fabrieke sluit vir die Kersvakansies gedurende middel Desember. Soos gewoonlik dink Trawler Heritage ook terug aan skuite van weleer wat ook hul verjaarsdae tydens November-maand gevier het. Hou maar solank 'n Twinsaver byderhand, want die name wat volg is genoeg om enige mens tot erge heimweë te dryf wat insluit "Rio Mewa", "Hesko" (staalskuit), "Ogri", "Snaefugl", "Drakenskop", "Oceana Mercury" (houtskuit), "Zuiderstêr II", "Rotterdam II" en "Vigri".

              (Die skuite se onderskeie ouderdomme word
                        hieronder aangetoon in hakies.)

                           Prospector (1)


                       Rebecca (2)


                        Makarios (3)


                       Thorfin (3)

Sarabi (4)

                         Iingwane (5)


                       Oshivelli (5)


                       Stormgans (5)


                     Southern Cross (6)


                          Aswan (9)


                   Oceana Neptune (10)


                       Terrasan 1 (11)


                        Megalodon (13)


                        Jabula (15)


                       Sparodon (17)


                       Don Marco (19)


                         Sparticus (19)


                        Erick W II (20)


                         Victory (26)


                        Zypher (27)


                        Bluebell (34)


                          Allison (36)


                        Paraclete (41)

       (Hierdie sal waarskynlik haar laaste verjaarsdag wees)

                        Tangeni Bay (44)


                        Golden Eagle (46)


                       African Queen (49)


                        Komukandi (49)


                        Oshakati (49)


                          Vezilifa (49)


                          Vegkop (50)


                           Zenica (50)


                           Mizpah (52)


                   Oceana Concorde (52)


                      Atlantic Leader (53)


                         Ebb Tide (56)


                          Kavalier (56)


                          Comet (64)


                         Endurance (71)

                      DIE ABC VAN SKUITE

                 NEE "SCOMBER", NIE SO NIE!

Nou mense, Trawler Heritage en "Scomber", 'n pelagiese skuit wat meestal werksaam is vanuit Mosselbaai en Port Elizabeth se koerse kruis nie aldag nie. Die "Scomber" het onlangs die Saldanhabaai skeepshelling besoek vir algemene herstelwerk en 'n skoon laag verf en onder andere is daar nuwe viniel naamplakkers op die skuit se whaleback toegevoeg...Afgeneem hieronder op 23 Oktober 2023 is bykans 10 sekondes van Trawler Heritage se lewe gemors ten einde hierdie hierogliewe geskrifte te ontsyfer. Nee o'hel, eerstens is die Mosselbaai areakode geheel en al opgemors, "MBA 158" is dit veronderstel om te lees. Die visvangkode "P" (pelagies) word tradisioneel na die areakode se nommer vertoon. Tweedens word daar nog 'n uitgediende "A" lisensie ook vertoon. Kom ek vat julle weer terug na 1999, toe die Suid-Afrikaanse regering die vissermanne onteien het van hul "A" en "B" lynvis lisensies. Kyk net vandag na die toedrag van sake in die tradisionele lynvis vissersgemeenskappe wat hul bestaan gemaak het uit lynvis...Kalkbaai, Struisbaai, Arniston en Gansbaai - dit gaan treurig! Terug by "Scomber"...word daar ook nog 'n "M" lisensie vertoon, oftewel 'n pelagiese aaspermit, wat eintlik in vandag se tye vervang word deur die "P" visvangkode. Trawler Heritage gaan nie verder torring aan die "M" lisensie nie, want op hierdie dag en datum vertoon "Duinekus" nog steeds 'n "M" lisensie, en om nou met die staalskuite te loop skoor soek, is iets waarvoor Trawler Heritage nie nou juis rêrig voor lus is nie.

Trawler Heritage het die foto hierbo met photoshop beetgekry en die nodige veranderinge daarop gemaak van hoe die areakode en visvangkodes beter vertoon kon word soos uitgebeeld hieronder...



      "SCOMBER" SE CHUTE, WAAR DIE SARDYNE
    "SUPERTUBE" RY TOT IN DIE SKUIT SE HOLD!

Mense, ons wyk dalk nou so bietjie van koers af, maar daar is net nog een ding wat Trawler Heritage vir die crew wil wys en dit is "Scomber" se nuwe ontwateringskerm tesame met 'n "chute". Nou die laaste keer dat Trawler Heritage en "Scomber" se koerse gekruis het, het die skuit nog van die skepnet-metode gebruik gemaak. Die manne het intussen uitgeskiet en 'n splinternuwe vispomp tesame met 'n ontwateringskerm toegevoeg. Dis eintlik daardie "swivel-chute" wat aandag trek, wat kompleet lyk soos 'n "supertube" waarmee die vis tussen die skuit se holds versprei word...siesa!

     MOOI SO DAFF, DIT LYK MOS BETER!

Die crew sal nog die foto hieronder onthou wat vroeër vanjaar op Trawler Heritage verskyn het van 'n kennisgewingbord wat DAFF gemonteer het teen die Vlekhuis se muur in Peperbaai waarop die woord "Vleik" aangetoon is, wat inderwaarheid geen betekenis het nie, aangesien daar nie 'n woord soos "vleik" eers bestaan nie. Intussentyd het DAFF egter hul kop in skaamte laat sak en stilletjies hulle fout gaan regmaak deur 'n vinielplakker bo-oor die bestaande geskrifte te plak...

VERKEERDE SPELLING "VLEIK HOUSE" - 21 JANUARIE 2023


KORREKTE SPELLING "VLEK HOUSE" - 23 OKTOBER 2023

                   LEGENDARIESE LYNVISSKUIT
                          UIT DIE VERLEDE

Afgeneem hieronder op 22 Oktober 2023 op B-Bos anderkant Gansbaai, staan die voormalige lynvisskuit "Normandie" feitlik nog onaangeraak nadat die skuit gedurende die 2018 snoek-seisoen omgekeer het. Trawler Heritage draai weer die tyd terug na 29 April 2018 toe die "Normandie" omgekeer het, waartydens een van haar crewmanne verdrink het. Bykans vyf weke later buitekant Elandsbaai het een van die "Ukuloba" se crewmanne 'n gedeelte van die "Normandie" se boeg bokant die oppervlakte sien uitsteek. Die "Normandie" is op sleeptou geneem terug na Sandy Point hawe. Die "Normandie" het opgeëindig by die woning van 'n pelagiese visserman wat beoog het om die "Normandie" weer na volle glorie te herstel het, maar gegewe die huidige toestand van die skuit, het hy nie baie ver (indien enige) vordering gemaak met die projek nie, en het die skuit intussentyd gemigreer vanaf St.Helenabaai na B-Bos...

                     GAAN DIE GESKIEDENIS
                    HOMSELF HERHAAL?

Afgeneem hieronder op 14 Oktober 2023 lê die jongste slagoffer van 'n kwynende kreefbedryf op 'n mooring in Hoedjiesbaai...Hierdie keer is dit die voormalige Oceana kreefskuit "Swartberg" wat nou wag om 'n nuwe rol elders te vervul. Trawler Heritage draai die tyd terug na Oktober 2017 toe nog 'n voormalige kreefskuit, die "Atlantic Ocean" ook onttrek was uit die bedryf en feitlik op dieselfde mooring gelê het, vanwaar daar beoog was om haar in 'n vragboot te omskep het. Lang stories en baie trane later, is die droom nooit verwesenlik nie, en moes die "Atlantic Ocean" einde ten laaste gesloop word sonder dat sy 'n enkele vrag vervoer het. Op die uiteinde was sy bestem om as 'n vertoonskuit by die S.A. Visserye Museum op droeë grond vertoon te kon word om te dien as 'n erfenisstuk, maar nee, toe besluit ons eie visbedryf daarteen en het die kettingsae die laaste sê gehad...kom ons hoop dieselfde lot tref nie ook vir "Swartberg" nie. Net tyd sal leer of die geskiedenis homself weer gaan herhaal.

                                   "SWARTBERG"
                    HOEDJIESBAAI - 14 OKTOBER 2023


                              "ATLANTIC OCEAN"
                      HOEDJIESBAAI - 14 OKTOBER 2017

                         "BLITZGANS" SE PYNE
                         WORD UITGEKLAAR

Nee mense, dis nie die tikkoppe wat toegeslaan het op "Blitzgans" (Stormgans se nuwe bynaam) se wielhuis en alles weggedra het nie. Al die elektroniese apparate in die skuit se wielhuis is kapoet - in kort gestel moertoe, nadat weerlig die skuit raak geslaan het en verwyder moes word om plek te maak vir nuwes. En dit is nog net die begin van die herstelfase - onder in die skuit se enjinkamer is dit nog nag. Op hierdie stadium van die seisoen het 'n man nie nog sulke bad-luck ook nodig nie.

     GLENRYCK SARDYNE IN BRAAISOUS

Hieronder is die nuutste toevoeging tot die reeks van Glenryck ingemaakte sardyne...Sardyne in Six Gun Grill sous. Ja-nee wragtag, dis ook net die Suid-Afrikaners wat hulle vis in braaisous sal blik. Trawler Heritage laat dit aan die crew oor om een van die blikkies aan te skaf en die inhoud vir hulself te evalueer. Die bemarkers van die plaaslike inmaakhandelsmerke is heel waarskynlik opsoek na iets nuuts, iets wat weer hul markaandeel kan vergroot en verbruikers se vertroue terug te wen, maar met die huidige trend van ingevoerde sardyne wat geblik word, is dit selfs die huiskat wat sy neus bly optrek vir hierdie geblikte vis - g'n wonder die kat staan en wag al in die oprit snags wanneer daar van die see af gekom word, met 'n regte egte vars Suid-Afrikaanse sardyntjie as beloning nie...

"Since 1937", wat julle waar vandaan gekry het? Terug in 1937 was daar nog nie eens canning fabrieke in Suid-Afrika gewees nie...

                 MAURITANIE PELAGIESE
                        VISEKSPEDISIE
                    54ste HERDENKING

                    19 Augustus - 6 Desember 1969

Dis weer daardie tyd van die jaar wanneer ons terugdink aan 54 jaar gelede toe talle van ons oupa's, pa's en ooms vertrek het vanuit Sandy Point hawe na die onbekende waters van Mauritanië in 'n poging om 'n beter heenkome te bewerkstellig het vir die "Suiderkruis" pelagiese fabriekskip, ten einde die pelagiese bronne om Suider-Afrika te kon beskerm.

On 19 August 1969 a fleet of wooden purse seiners under command of a breed of fishermen, of the likes we shall never see again, set sail from Sandy Point Harbour destined for the unknown fishing grounds of Mauritania. Accompanied by the "Suiderkruis" factory ship, they had to leave in order to protect our pelagic resources.

               ONS ERFENIS - ONS TROTS!

Afgeneem hieronder tydens die 1962 pelagiese seisoen nader die "Walvis Pioneer" die aflaaikaai by Walcano in Walvisbaai met nog 'n vrag sardyne in haar holds, kompleet in die tradisionele "checkers" kleurskema soos destyds gebruik was deur die Fernandes-familie.

                            "WALVIS PIONEER"


Afgeneem hieronder loop die "Rondeberg" stroom af verby voor die fabriek van AIF in Velddrif, onderwyl die Carinus brug nog onder konstruksie was in die agtergrond. Hierdie kaliber skuite was alreeds deel van die tweede generasie lampara skuite wat werksaam was vanuit die Bergrivier waarvan hul ontwerp geskoei was op die Kaliforniese lampara skuite wat werksaam was in die V.S.A. op daardie stadium. Ons plaaslike vissermanne het egter baie vinnig ontdek dat die wielhuise voor-op die skuit se kop nie geskik was vir Suid-Afrikaanse seekondisies nie, aldus het dit gelei dat alle wielhuise na die agterstewes verskuif was.



Aangetoon hieronder met die rooi sirkel is 'n addisionele skuitwiel bo-op "Rondeberg" se wielhuis gemonteer, wat bedoel was om gebruik te word wanneer daar op skole vis jag gemaak word. Die plaaslike vissermanne het dit as 'n oorlas beskou, en het hierdie tipe uitleg nooit enige aanklank gevind in die Suid-Afrikaanse visbedryf nie.

           SACHAL CHUKKIES IN DIE MARK

Vir al die Sachal chukkie aanhangers daarbuite wat nog altyd daarvan gedroom het om jul eie een te kan besit, hier is nou julle kans! Benewens die "Steenbrasdam" wat hier langsaan vertoon word, is daar nog drie ander ook in die mark op die oomblik waaronder "Malgas", "Jakkie V", en "Jenny-Lee". Al drie skuite se besonderhede is beskikbaar op Facebook Marketplace onder die soekwoorde "Fishing vessel for sale" asook "Boat, fully equipped".

                         "MALGAS" - MOSSELBAAI


                       "JAKKIE V" - PORT NOLLOTH


                    "JENNY-LEE" - PORT ELIZABETH